مشوار و قصة.. السفينه الصفراء..!! /احمد دعموس

من طرف **غادة شقاقحة** في 5/7/2008, 9:54 am

خرجت مسرعا من مقر راديو البلد في وادي صقره.. باحثا عن تاكسي يوصلني عا جامعة العلوم التطبيقيه…

وقفت عالشارع الرئيسي ثلث ساعه…

كل واحد بمر يا اما برضاش بوقف يا اما بعجبوش مشواري.. و في واحد كان صريح و قلي معلش اذا ما معك بنات انا ما بقدر… بحب الوجه الحسن اخينا…

شو بدنا بطول السيره.. شيل الليف حط الليف…

بوقف بالاخر تكسي كأنه مهرجان.. او ديسكو… او …………؟؟!!

طمبونات حمر… ضواو زينون… شبرات نكل… و لزقات و ستكرز و رضاكي يا امي و محبوبة رائد و الاميره سمر , و , و , و ….. الخ

فتحنا الباب و قلنا : ( بسم الله يا رب )

قام اخينا شال سي دي مصطفى كامل و حط على 93.1 اذاعة القراّن..

طبعا انساك من لوحات الاعلانات اللي جوا…

” عامل الباب بهدوء و اغلق السائق بلطف”

” التدخين مسموح يوم بعد يوم وو اليوم ممنوع “

” العداد للزينه “

” اذ انتي حلوه انا اعزب “

” 079والباقي ما تغير “

ولن انسى الاضواء الزرق و الشبرات الحمر و السستم اللي من الاخر….

مرينا عن بنت مزه.. فتصرفت كأي شب عادي… و اعطيتها نظره خاطفه…

هون اتطمن اخينا السايق و رجع سي دي مصطفى كامل … و اعطاها فوليوم عالاخر وقلى ” اهم شي بالشب يكون وظعه لوز”

طبعا انا ما فهمت… فالتزمت الصمت.. و للدقه العلميه بوصف شكلي .. الواكس واصل للسما و البنطلون ساحل للارض… يعني حسب ثقافة هذا السائق ان اعتبرنا مفاهيمه ثقافه… فأنا عباره عن طنط اصلي… فشو قصده كان ب… ( وظعه لوز )..

وطا صوت ” السستم ” و قالي:

” و عرظ خواتي, هاظا التكسى موديل 2007.. اله معاي 5 سنين.. و عرظ خواتي انت اول ذكر بيطلع فيه… انا ما بحمل اللا نسوان.. “انا ساكت.. و ببلع ريقي بهدوء و ترقب..

و بعد لحظات صمت … واصل كلامه بقول: ” هظاك اليوم كنت واقف عند البوابة الشماليه.. ناح الجامعه الاردنيه, ولا هالاموره بتفتح الباب الخلفي و بتطلع.. قال بدها اوخذها لفه… طبعا طلعت بالسياره محجبه.. بعد خمسين متر كانت التنوره فوق الركبه..” و قبل ان يتابع سرد تفاصيل روايته المهترئه .. طلبت منه التوقف عاليمين لاني تذكرت اشي مهم… والله اني انا احمد دعموس سمعت نفس القصه بنفس التفاصيل كامله اكثر من 15 مره .. و كل مره من سائق مختلف…

نزلت عا اشارة الحدائق.. و قبل ما انزل اعطاني رقمه الدونجوان و قلي .:.” اذا مواعد الخسه و شتت عليكم الدنيا ابعتلي مسد كول بسمعك الالوه. و بكون عندك “

طبعا عملت حالي ولا انا هون و نزلت.

وقفت عالشارع مره اخرى..و بعد انتظار وقف تاكسي اخر… يبدو عليه الوقار..

قلنا الحمدلله… طلعنا بالسياره.. ولا هو شيخ… مشغل شريط محاضره مليء بالصراخ و الرعب… و انا مش فاهم شو بقولو.. بس كنت حاسس انه هالشيخ ممكن يهدر دمي باي لحظه..

.فجأه .. خفض الشيخ الصوت و قاللي…” يا اخي” …. انا ارتجفت..

”عيونك حمر…. و هذا و العياذ بالله يدل و العلم عند الله على مرض باطني.. ولكن قدر الله و ماشاء فعل… قوي ايمانك و اصبر.. انما يبتلي الله المؤمنون.. و ثق تمام ان ما انزل الله من داء اللا جعل له دواء..”

انا طبعا قلبي صار ب ( *****) لو ما كانو حمر…. بعد هالكلمه احمرو و ازرقو و كل وحده صارت تتطلع على جهه…

ولا هو بحكيلي…: “ علاجهم عندي.. انا اخوك في الله الدكتور الشيخ ابو معاويه ” حاصل على شهادة الزعفرانه المباركه في الطب العربي و العلاج بالخزعبلات “

و طال كرت من كروت النصب ( ابو الالف ب 5 ليرات مع ميتين ستكرز مجانيه) و اعطاني ايه.. و قال: “ شرفنا على على العياده متطهرا متطيبا.. متدرهما… و ستخرج بإذن الله جديدا لنغا “… انا يا حبيبي بالهريبه ديبك.. فتحت الباب على دوار المدينه, و يا روح ما بعدك روح… بلاش يطلع الممرض تبعه من الجن البنفسجي قاعد بالكرسي الخلفي…

لقطت نفسي و تكتكت حالي ووقفت من جديد انتظر تاكسي..

اشرناله وقف… ما تقول الا نازل تل الرمان… مجعص شومخر… السياره بتزحف عالارض زحف… و جنطات عراض.. و صوتها عالي.. و كراسي حمر.. وعدادات سرعه.. و فتحات تيربو عا غطى الماتور… و ستكرز و لزقات و اشي غير شكل.. و الاخ جاعص تقول قاعد عالكرسي الوراني..طلعنا بالسياره… ولا بلشت رحلة الفورمولا ون.. و كان مضمار السباق عبارة عن شارع الجامعه المزدحم.. يسابق الريح.. بتوينات و تجاوزات ارهابيه… وما انو وقفنا في ازمة جسر الجامعه حتى قلتله… يعطيك العافيه… مبروك المركز الاول… و انا بصراحه لسه صغير و مش حابب اموت قبل ما اتجوز… اعتبر حاله توقف في نقطة صيانه و ما حطيت رجلي عالارض و لا كان مبلش بالمرحلة التانيه…

اخ عا هاليوم المش راضي يمشي….

وقفلنا تاكسي اخر… لفت نظري كرتونه ملصقه على الزجاج من الداخل … ركبت في السياره محاولا اكتشافها .. فلم افهم منها اللا كلمة “” كونغفو “” حيث كانت مكتوبه بلغه اقرب ما تكون الى الفينيقي..

نظر الي السائق و قال …” لا تستغرب… شهادة هندسه من اكبر جامعات اميركا…. بس ااااااااااااخخخخ الله يجازي اللي كان السبب… ترى لا يغرك… انا بطلع عالتكسي من القرف… انا اهلى باميركا و انا متجوز باميركا و عندي ولد و بنت… مايكل و فاطمه.. مرتي سمت الولد و انا سميت البنت.. انا مهدس جينات و كيميا نوويه من اميركا.. بس جيت هون و هي اخرتها …. لا يغرك هه… انا هسع بنزلك و بظل بوجهي عالمطار لا يغرك.. انا عندي فيلا اربع طوابق و سياره ترانس ام غاد…. انا قعدت باميركا توينتي فايف ييرز… 20 سنه هظول… تونتي فايف ييرز… عشرين سنه… عمر يابا.. مي سبيك لندم فري بست.. مي توك ثري لانغويج.. لندن.. ارابيك اند ايجبت.. هاي كرتي اذا صحلك مشوار عا اميركا كوول مي.. اميركا از عالم ثاني يابا … لايف از ايزي… غيرلز اند درينك… لايف از طقع…”

طقعت الباب وراي و قلت اي هو انا ناقصني عرط يحل عن سماي.. من جسر الجامعه لشارع الاردن و هو يقلي عن اميركا.. اي بالحرام عمره ما وصل العقبه… بجوز بفكر المطار الرسمي بعده بماركا….

اشرنا لواحد ثاني… وكان حاتم العراقي يهز ارجاء سيارته المتهالكه.. واللتي تصدر اصوات الجوقه الموسيقيه من مفاصلها .. اكثر من مسجلها…

ذابت نظره طويله منه في وجهي.. وقال بذكاء يدل على حنكته و نباهته…. شكله الاخ طالب جامعه ؟؟

فجاوبته بهزة راس تفي بالايجاب..

قال.. الله يكون بعونك… اذا رايح جاي بتكاسي.. معناته صار عندك وجع راس من قصصهم الفارطه اللي كلها عرط بعرط…

انا سمعت هالحكي و قلت.. معقول يكون في واحد غير شكل..؟؟؟!!!!!

والله الزلمه ماشي على مهله.. و مرتب اموره و حالق لحته… يا عمي والله هالزلمه غير…

اللا هو الاخ بقللي..: ” شو رايك تشتريلك سياره بالاقساط…؟؟ “

قلناله ان شالله… في حوليك اشي ؟؟

قال انا بتاجر بالسيارات… و عندي معرض بالحره.. و اكثر اشي بشتغل بالكيا سيفيا… عندي المواصفات غير شكل… اكتب طلباتك و اضافاتك الخاصه عا ورقه .. و بكرا بتجهز مركبتك…

بقله ليش بتجيب من كوريا ؟؟؟؟؟

قال : ” له يا زلمه .. عيب هالحكي…. انا بصدر كيا سيفيا من الاردن لا كوريا ” فتحت الباب ونزلت قبل الجامعه بكيلو… قبل ما يرن علي كياتو سيفيان الكوارنه.. يطلب من شحنه مع قطعها…”

يا سواقي التاكسي ارحمونا… كفانا تلك القصص الموحده….

لو كانت دائرة السير بتوزع مع الرخصه كتيب بعنوان ” الساحر لعرطات السائق الماهر” او كتاب ” الخفه في تطويل اللفه ” او ” الاجواد ما بدققو للعداد” كان اقل ما فيها اختلفت طريقة سردكم للقصه…

و عرظ اختي عراسي…

دعموووووس